Alarmak
Larrialdi kimikoetarako sirenen sarea aktibatzeko ariketak egingo dituzte asteotan, EAEn
eitb media
Industria kimikoetan gerta litezkeen eta ihes toxikoek eragin ditzaketen istripuei begira inguruko herritarrak alarma-sistema horretara ohitzeko saioak izango dira.
Larrialdi kimikoen abisua. Argazkia: Irekia
AVEQ-KIMIKAk, EAEko Enpresa Kimikoen Elkarteak, Eusko Jaurlaritzako Segurtasun Sailarekin lankidetzan, larrialdi kimikoetarako sirenen sarea aktibatzeko saioak egingo ditu datorren ekainaren 14an, 17an eta 18an.
Ariketak Hernanin, Muskizen, Santurtzin, Punta Luzeron (Zierbenan) eta Lantaronen egingo dituzte, SEVESO araudiaren menpeko industria kimikoetan gerta litezkeen eta ihes toxikoek eragin ditzaketen istripuei begira inguruko herritarrak alarma-sistema horretara ohitzeko. Eusko Jaurlaritzatik jakinarazi dutenez.
SEVESO araudiak substantzia arriskutsuak tartean dituzten istripu larrien prebentzioa arautzen du. Testuinguru horretan, sirenen eginkizun nagusia abisu-sistema indartzea eta berehalako alerta lortzea da, eraginpeko herritarrek istripu-kasuetarako oinarrizko autobabes-aholkuak abian jar ditzaten.
Sirenek bi seinale-mota igorriko dituzte, argiak eta entzuteko moduan, arriskuko gune osoan: bata hodei toxikoagatiko alertaren hasiera adierazteko eta bestea alertaren amaiera iragartzeko. Alerta hasten denean, herritarrek toki itxian konfinatuta geratu beharko dute.
Ariketen egutegia:
Ekainak 14 - Hernani (Electroquimica de Hernani) 10:00etan
Ekainak 17 - Muskiz (Petronor) 10:00, Santurtzi (Bilboko Portua, Weylchem Bilbao) 11:00, Punta Luzero (TEPSA, Acideka) 11:30
Ekainak 18: Lantaron (Dekitra, General Quimica) 11:00