ELIZA KATOLIKOA
Ostiralera atzeratu dute Beloradoko eta Urduñako klaratar mojen hiru buruzagien agerraldia Artzapezpikutzan
AGENTZIAK | EITB MEDIA
Hiru moja horiek izan ziren Mario Iceta artzapezpikuaren aurkako salaketa sinatu zutenak. Datorren ostiralean agertu beharko dute Burgosko Artzapezpikutzan, beste bost mojarekin batera.
Mojetako bi poltsa batzuk jasotzen. EITB Mediaren bideo batetik hartutako irudia.
Igande honetan amaitzen zitzaien Beloradoko (Burgos) eta Urduñako (Bizkaia) hiru klaratar mojari, sor Isabel de Trinidad abadesa ohiari eta Icetaren aurkako salaketa sinatu zuten beste bi mojei, Burgosko Artzapezpikutzaren eliz auzitegian deklaratzera joateko emandako epea. Halere, luzapena eskatu dute, eta Artzapezpikutzak onartu egin die.
Burgosko Artzapezpikutzako iturriek jakitera eman dutenez, Eliza katolikoaren organo horrek bost eguneko luzapena eman die, eta hilaren 21ean agertu beharko dute auzitegi horretan.
Horrela, hiru moja horiek beste bost mojarekin batera deklaratuko dute egun horretan. Azken horiek aurretik zuten zitazioa eta beste bi mojak egun batzuk geroago hartuko dituzte. Gainerako bostek (15 dira guztira) ez dute oraindik errekerimendurik jaso, Elizak uste baitu ez dutela parte hartu mojek Burgosko Artzapezpikutzarekin irekita duten gatazka honetan.
Artzapezpikutzak azaldu duenez, luzapena "prozesu administratiboa" da, eta, egun horiek amaituta, mojek auzitegira joan beharko dute "banakako agerraldia egitera". Mojei entzun eta gero "hartuko da erabakiren bat".
Eskumikatzea erabakiz gero, komentutik alde egin beharko lukete.
Ekainaren 13an hilabete bete zen mojek manifestu katoliko eta gutun publiko bat kaleratuta Eliza katolikotik ateratzera erabaki zutela jakinarazi zutenetik. Erromako Elizatik atera eta 2009an eskumikatu zuten Pablo de Rojas gotzainak sortutako Pia Unio Sancti Pauli Apostolira batu ziren.