migrazioa
EAEko erakundeek kontingentzia plana eskatuko dute bidaiderik gabeko adingabe atzerritarrak banatzeko orduan
E. G. | EITB Media
Maria Ubarretxena Jaurlaritzako bozeramaileak azaldu duenez, gobernuak eta aldundiek telematikoki hartuko dute parte biharko bilera sektorialean. "Arazo estruktural" bati aurre egiteko egitasmo "serioa" galdegingo dute, erkidego guztiek eskubide eta betebeharrak dituztela gogorarazita.
Fuerteventurara (Kanariak) heldutako hainbat pertsona. EFE
Eusko Jaurlaritzak eta hiru foru aldundiek kontingentzia plana eskatuko dute Espainiako Estatura, Kanarietara zehazki, gurasorik gabe heltzen diren adingabe atzerritarrak erkidegoen artean banatzeko orduan.
Hala jakinarazi du gaur, kazetariek galdetuta erantzunez, gobernu bileraren osteko agerraldian, Maria Ubarretxena Eusko Jaurlaritzako bozeramaileak. Izan ere, bihar Espainiako Gobernuak eta autonomia erkidegoek bilera dute Tenerifen gaia eztabaidatzeko.
Ubarretxenaren esanetan, Jaurlaritzaren eta foru aldundien ordezkaritza batek —azken horiek dute eskuduntza— telematikoki hartuko du parte batzarrean, "proposamen bateratu eta adostua" mahai gainean jartzeko. Bidaiderik gabeko adingabe atzerritarren auzia "arazo koiuntural" izateari utzi diola azpimarratu du eledunak, eta "arazo estrukturala" den heinean, erantzun "serioa" eman behar zaiola erantsi.
Esan duenez, erkidego guztiek ez diote modu bertsuan erantzuten arazoari. Hala, zehaztu duenez, EAEn 761 adingabe daude artatuta (511, Bizkaian; 180 Gipuzkoan, eta 70, Araban). Errioxan, aldiz, bederatzi.
"Eskuak zabalik eta elkartasunez erantzuteko prest gaude, betiko moduan", adierazi du. Dena dela, uste du erkidegoek "eskubideak eta betebeharrak" dituztela auzi honetan.