Bilbotik Santanderrera zihoan tren bat hustu dute, matxuratuta gelditu ostean

Renferen Bilbo eta Santander arteko aldirietako tren zerbitzua eten dute gaur goizean, konboi batek matxura izan eta trenbidean ez atzera ez aurrera geratu ostean, Renferen iturriek adierazi dutenez. Trena Marron eta Treto udalerrian artean gelditu da, eta 20 bidaiari inguru bi orduz barruan harrapatuta egon dira, erreskatatu dituzten arte.

Matxura izan duen trena 08:30ean irten da Bizkaiko hiriburutik, eta 11:42an iristekoa zen Kantabriako hiriburua. 10:30 aldera, ordea, Tretoko (Kantabria) geltokitik 500 metro eskasera, gelditu egin da, bidaiariak barruan zeudela.

Kantabriako Larrialdi Zerbitzuek 13:10 aldera jaso dute abisua, eta Guardia Zibilak ez ezik, Laredoko suhiltzaileek ere parte hartu dute erreskate lanetan. Zehazki, trenetik jaisten lagundu diete, inguru horretan ez baitago bidaiariak trenera igotzeko edo trenetik jaisteko nasarik.

Ondoren, oinez, inguruko errepide batera eraman dituzte, eta handik, autobusez edo taxietan, azken helmugara.

Gertakari horren ondorioz, distantzia ertaineko tren zerbitzua eten dute, eta autobusak baliatu dituzte arazoak konpondu bitartean zerbitzua emateko.