Jaiotzagatiko baimena
Guraso bakarreko familiei jaiotzagatiko baimenak 16 astetik 26ra luzatzea onartu du Auzitegi Gorenak
Agentziak | EITB Media
Epaiak "adingabearenganako edozein diskriminazio mota" saihestu nahi du. Oraingoz, familiaburuak enplegatu publikoak diren guraso bakarreko familiei baino ez die balio baimenak; gainerakoek itxaron egin beharko dute, haien egoera Konstituzio Auzitegian ebazteko baitago.
Ama bat bere haurrarekin.
Auzitegi Gorenaren ebazpen baten arabera, langile publikoak buru dituzten guraso bakarreko familiek eskubidea izango dute haur baten jaiotzagatiko baimena 16 astetik 26 astera luzatzeko, jaioberriaren diskriminazioa saihesteko.
Administrazioarekiko Auzien Salako Laugarren Atalak eman du epaia, eta bertan onartu du hori dela Langile Publikoen Estatutuan araututako baimenari eman behar zaion interpretazioa. Valladolideko irakasle batek errekurtsoa aurkeztu zuen; izan ere, 16 asteko amatasun-baimenari beste gurasoari legozkiokeen gainerako 10 asteak gehitzeko eskaera ukatu zioten (gainerako 6 asteak gurasoek batera hartu beharrekoak dira, haurra jaiotzen denetik hasita).
Administrazioarekiko auzien epaitegi batek arrazoia eman zion amari, indarrean zegoen araudia bi gurasoz osatutako familia-ereduari bakarrik aplikagarri izatea "argi eta garbi" diskriminatzailea zela iritzita; Gaztela eta Leongo Justizia Auzitegi Nagusiak, ordea, baliogabetu egin zuen epai hori.
Jaiotzagatiko baimenak luzatzeari buruzko eztabaiden aurrean irizpide desberdinak erabili dituzte sala eta justizia auzitegi nagusi desberdinetan, baina Gorenaren epaiak adingabe jaioberrien interesa lehenestea erabaki du orain, "familia mota batean edo bestean jaiotzeagatik, edo beste edozein egoera edo zirkunstantzia pertsonal edo sozialengatik edonolako diskriminazioak saihesteko".
Gorenaren esanetan, haurra ezin da diskriminatu duen familia motagatik, eta bi guraso dituztenetan bezalaxe, ama edo aitaren zaintzaz, arretaz eta babesaz (Kode Zibilaren 68. artikuluak ezartzen duena) 26 astez gozatzeko eskubide berbera dutela guraso bakarra dutenek.
Orain arte, legeak berariaz arautu duen guraso bakarreko familiaren kasu bakarra amaren heriotzak eragindakoa da; kasu horretan, eta horretan baino ez, batu zitezkeen orain arte bi gurasoen baimenak.
Hala ere, Gorenaren epaiak, printzipioz, ez die eragingo familiaburuak enplegatu publikoak ez dituzten guraso bakarreko familiei, Konstituzio Auzitegian ebatzi gabe baitago haien egoera, eta hainbat errekurtso aztergai.