Epaiketa
Astelehenean hasiko da Suesan autoarekin harrapatu eta hiru lagun hil zituen gizonaren aurkako epaiketa
Agentziak | EITB Media
Hildakoetako bi Sestaoko ama-semeak ziren. Akusatuak 73 urte zituen gertakarien unean, 79 km/h-ko abiaduran zihoan 50 km/h-ko gehienezko abiadura gune batean, eta baimendutako alkohol-tasa ia hirukoiztu egiten zuen. Gainera, sendagaien kontsumoaren eraginpean zegoen.
Harrapaketa gertatu zen tokia. EFE.
Gaur hasiko da iazko, apirilean, Kantabriako Ribamontan al Mar udalerriko Suesa herrian, hiru lagun autoarekin harrapatu eta hil zituen gizonezkoaren kontrako epaiketa. Biktimak Sestaoko 42 eta 19 urteko ama bat eta haren semea eta Errioxako Santo Domingo de la Calzadako 68 urteko emakume bat izan ziren.
Hilaren 4tik (astelehena) 6ra (asteazkena), Kantabriako Probintzia Auzitegian egingo da epaiketa. Lehen Sekzioko auzitegiak epaituko du 2023tik behin-behineko espetxealdian den gizona.
Gertakarien unean 73 urte zituen, orduko 79 kilometroko abiaduran zihoan 50 km/h-ko abiaduran mugatutako tarte batean, eta baimendutako alkohol-tasa ia hirukoiztu egin zuen. Gainera, medikamentuen efektuen eraginpean zegoen.
Istripua 2023ko apirilaren 4ko 20:00ak aldera gertatu zen, akusatuak ibilgailuaren kontrola galdu eta bidetik atera zen CA-433 errepidean, Suesa parean.
Herriko kanpinean ostatu hartuta zeuden eta bide ondoko oinezkoen pasealekuan ibiltzera irten ziren hiru pertsona hil zituen.
Sei delitu leporatzen dizkiote: hiru, arduragabekeriazko homizidio larriagatik; bat, arduragabekeriazko lesio larriengatik; eta bana ausarkeriaz eta alkoholaren eraginpean gidatzeagatik.
Fiskaltzak 6 urteko espetxe zigorra eta biktimen familiarentzat 600 mila euroko kalte-ordaina eskatzen ditu; biktimen senitartekoek, berriz, bederatzi urteko espetxe zigorra eta ia miloi bat euroko kalte ordaina, eta defentsak, absoluzioa.