EAEko etxeen % 90ek baino gehiagok dute Interneterako sarbidea

Euskadiko familien % 91,2k Interneterako sarbidea dute 2024an, hau da, 2014. urtearekin alderatuta, datuak 24,8 puntuko igoera izan du. Ehuneko hori % 98,4raino igotzen da 16 eta 74 urte bitarteko gutxienez pertsona bat duten familien kasuan, Eustat Euskal Estatistika Erakundeak asteazken honetan zabaldutako datuen arabera.

Ordenagailuak etxeen % 77,1ean daude, 2014an baino ehuneko 8,1 puntu gehiago, eta ordenagailu eramangarrien kasuan, etxeen % 59,9an. Gainera, EAEko etxebizitza ia guztietan (% 98,2k) telefono mugikorren bat dute, hau da, duela 10 urte baino 5,2 puntu gehiago.

Inkestak aditzera eman duenez, bestalde, EAEko biztanle ia guztiek Internetera sarbidea dute, eta % 97,7 whatsapp bidez edo berehalako mezularitzako beste aplikazio batzuen bidez komunikatzen dira. Helbide elektronikoa, berriz, % 85,2k erabiltzen dute.

Interneteko erabiltzaileen % 57 sare sozialetan ibiltzen dira, eta ehuneko hori % 88,3ra igotzen da 15 eta 24 urte bitarteko pertsonen artean. Banku-aplikazioak, berriz, Internetera sartzen direnen % 74,1ek erabiltzen dituzte, eta % 53,1ek ostatu- edo bidaia-erreserbak egin dituzte.

Eustatek merkataritza elektronikoari buruzko datuak ere ematen ditu, eta % 56,8k zerbitzuren bat erosi dute azken 3 hilabeteetan, 977.500 pertsonak. Zifra hori 15 urte eta gehiagoko EAEko biztanleria osoaren % 51 da. Hala, duela 10 urte Internet bidez erosketak egin zituzten pertsonen kopurua ia bikoiztu egin da. Arropa, oinetakoak eta osagarriak, etxerako ondasunak edo kultura-ekitaldietarako sarrerak dira Internetez gehien erosten diren zerbitzu edo produktuetako batzuk.

Enpresa alorrean

Enpresen % 96k Interneterako sarbidea dute eta % 57,4k web-orriak. Azken 10 urteetan, enpresan ordenagailuak erabiltzen dituzten langileen ehunekoa % 67,6tik % 77,5era igaro da. Enpresa guztiek erabiltzen dute internet, eta % 97,7k administrazioekin izapide elektronikoak egiten dituzte.