77768 eta 48020 laugarren saridun zenbakiek poza zabaldu dute Nafarroan, Bizkaian eta Gipuzkoan

77768 zenbakiari egokitu zaio gabonetako loteriaren zozketako laugarren sarietako lehena, 200.000 euro serieko (20.000 euro dezimo bakoitzak).

Lehen laugarren saria 09:58an atera da, eta serie gehienak (50 baino gehiago) Madrilen, Guia de Isoran (Tenerife) eta Benidormen (Alacant) saldu dira.

400.000 euro banatu ditu Nafarroan, Cordovilla, Lodosa, Iruñea eta San Adrian herrietan.

Altsasuko Zumalakarregi plazako 4. zenbakian dagoen 2. loteria administrazioak serie oso bat eduki du salgai, baina itzuli egin du osorik, ez baita zenbaki horren dezimorik saldu, eta beraz, saria ia-ia esku artean izan badute ere, ez die azkenean ezer utzi 77768 zenbakiak. 

Bestalde, Cordovillako La Morea merkataritza-gunean eta Lodosako Diputazio etorbideko 12. zenbakian dauden establezimenduek bina dezimo saldu dituzte, 80.000 euro. 

Iruñean, bost establezimenduk saldu dituzte zenbaki irabazlearen dezimoak: Miravalles, 17; Karlos III .a etorbidea, 55; Barañain etorbidea, 64; Gaztelu plaza, 30; eta Tutera kalea, 3. Beste dezimo bat Pelayo Sola kaleko 7. zenbakian dagoen denda batean saldu da, San Adrianen.

77768 zenbakiaren zati bat Bizkaiko eta Gipuzkoako hainbat herritan ere saldu da, 500.000 euro pasatxo banatu baitira saritan.

Bilboko 55. administrazioan, Santutxun, sariaren serie oso bat saldu dute, hau da, 200.000 euro saritan. Bizkaiko hiriburuan, beste lau administraziotan ere saldu dira zenbaki hori duten beste horrenbeste dezimo.

Gainera, bost dezimo saldu dira Barakaldon, lau Basaurin eta bi Areatzan.

Gipuzkoan, bi dezimo saldu dira Donostian eta beste bat Hernanin.

Zenbakia 09:57an atera dute, bigarren taulako bosgarren alanbrean.

Laugarren sarietako bigarrena 48020 zenbakiarentzat izan da, eta 400.000 euro utzi ditu Bizkaian, serie bat saldu baita Urkixo zumarkalean (Bilbo) eta beste bat Artean (Leioa).