Siria
Estatu Islamikoak su emanda hil du bahituta zeukan jordaniarra
Erredakzioa
Jordaniako Gobernuak iragarri du gogor erantzungo duela eta, hasteko, Estatu Islamikoak pilotuarengatik trukatu nahi zuen jihadista irakiarra hil egingo du.
Your browser doesn’t support HTML5 video
Estatu Islamikoa talde jihadistak su emanda hil du Muaz Kasabeh pilotu jordaniarra, abenduan Sirian bahitu zuena, eta Interneten zabaldutako bideo batean erakutsi du hilketa.
Jordaniako Gobernuak iragarri du gogor erantzungo duela eta, hasteko, Estatu Islamikoak pilotuarengatik trukatu nahi zuen jihadista irakiarra hil egingo du "ordu batzuk barru". Bestalde, pilotu jordaniarra urtarrilaren 3tik hilda dagoela jakinarazi du.
Estatu Islamikoak zabaldutako 22 minutuko bideo horretan, Kasabeh ageri da eraitsitako eraikin batzuen artean oinez, eta zain ageri dira maskarak daramatzaten jihadista batzuk.
Gero, pilotua kaiola baten barruan ageri da, eta tartean AEB buru duen nazioarteko koalizioko aireko indarrek ustez hildako biktimen irudiak sartu dituzte. Gogoratu behar da koalizio horretan parte hartzen duela Jordaniak, hildako pilotuaren jatorrizko herrialdeak.
Maskaradunetako batek zuzia darama eskuan, eta metxa bat piztu eta kaiolak su hartzen du. Sugarrek berehala hartzen dute kaiolaren barrualdea, eta biktima suak erreta hiltzen da.