Krisia eurogunean
'Corralito'a Grezian: bankuak itxita izango dira uztailaren 6a arte
AGENTZIAK | ERREDAKZIOA
Herritarrek egunean gehienez ere 60 euro atera ahalko dituzte kutxa automatikoetatik. Burtsa ere itxita egongo da, astebete gutxienez.
Your browser doesn’t support HTML5 video
Greziako Gobernuak corralito-a ezarri du: bankuak itxita egongo dira gaurtik uztailaren 6a arte, eta herritarrek egunean gehienez ere 60 euro atera ahalko dituzte kutxa automatikoetatik.
Atenasko Burtsa ere itxita izango da, gutxienez astebete.
Gobernuak onartutako dekretuaren arabera, kutxa automatikoak 12 orduz irekiko dituzte gaur. Herritarrek kreditu txartelen bidez egin ahalko dituzte ordainketak, baina bankuen webguneetatik.
Turistei ez diete ezarri kapital kontrolik, eta dirua atera ahalko dute euren herrialdeetako kreditu-txartelak erabilita.
Atzerrirako transakzioei dagokienez, oinarrizkoenak egin ahalko dira; sendagaiak erosteko, adibidez. Batzorde batek gainbegiratu eta onartu beharko ditu operazio guztiak.
Pentsioei ere ez diete mugarik edota kontrolik ezarri.
Telebistan egindako agerraldi batean, Alexis Tsipras lehen ministroak Eurotaldeari egotzi dio egoera honetara heldu izana, erreskatea luzatzea baztertu baitu.
Tsiprasek erreferenduma deitu du iganderako, nazioarteko erakundeek (Europako Banku Zentrala, Europako Batzordea eta Nazioarteko Diru Funtsa) egindako azken proposamena onartu edo ez erabakitzeko.
"Erreskatea luzatzea ukatu izanak kapital kontrolak ezartzera behartu gaitu", salatu du Tsiprasek, eta hurrengo egunetan "lasaitasuna" mantentzeko deia egin du.