Akordio transatlantikoa
TTIParen inguruko gomendioak onartu ditu Europako Parlamentuak
Agentziak | Erredakzioa
Europako Alderdi Popularrak, sozialdemokratek eta liberalek babestu dute ebazpena, inbertitzaileen arbitraje sistemaren inguruan akordioa adostu ondoren.
Darion Tamburrano eta Piernicola Pedicini europarlamentariak TTIPren aurkako kartelekin. EFE
Duela hilabete bozketa atzeratu zuten, baina gaur Europako Parlamentuak AEBrekin Merkataritza eta Inbertsiorako Akordio Transatlantikoa (TTIP, ingelesez) negoziatzeko gomendioak onartu ditu.
Europako Alderdi Popularrak (PPE), sozialdemokratek (S&D) eta liberalek (ALDE) babestu dute ebazpena, inbertitzaileen arbitraje sistemaren inguruan akordioa adostu ondoren. Euroganberarentzako gai polemikoena zen.
Sistema ?ez diskriminatzaile? bat eskatu dute eurodiputatuek, ?epaile independenteek? sisteman parte hartzea, eta ?interes pribatuak interes publikoen gainetik ez jartzea?.
Europako langileen babesa
Arbitraje sistemaz gain, Europako langileak babesteko marra gorria ezarri dute parlamentariek.
Nazioarteko Lan Erakundearen estandarrak errespetatzeko konpromisoa eskatzen die ebazpenak AEBri, bestela Europako Parlamentuak betoa jartzeko aukera izango du akordioa bozkatzen denean, negoziatu ondoren.
Europako Batzordeari eman beharreko gomendioek aldeko 436 boto jaso dituzte eta kontrako 241, eta 32 abstentzio izan dira. Bernard Langue Alemaniako sozialista izan da txostengilea. Horrela, negoziazioaren lehentasunak ezarri ditu Ganberak.
PSOE, alde; Podemos, kontra
Europako ekologistek eta ezkerrak (GUE/NGL) TTIParen aurkako botoa eman dute. Europako lan merkatuaren eta ingurumenaren estandarrei kalte egingo diela uste dute Podemosek eta IUk, besteak beste.
Espainiako eurodiputatu sozialistek, ostera, aldeko botoa eman dute. Espainiako sozialisten botoa kritikatu du Marina Albiol IUko bozeramaileak. TTIP EBko eskubide sozialen aurkako Troiako zaldia dela adierazi du Albiolek.