Venezuelako Gorenak ez ditu Parlamentuaren zereginak bere gain hartuko

Venezuelako Auzitegi Gorenak iragarri duenez, ez ditu bere gain hartuko Parlamentuaren zereginak. Nicolas Maduro presidenteak Asanblea Nazionalari botereak kendu dizkion epaia berrikustea eskatu dio Gorenari.

Hala, epaiaren hainbat atal baliogabetuko dituela adierazi du Auzitegiak, Parlamentuaren zereginak bere gain hartzeko hartutako erabakia bertan behera utzita.

Estatuko buruak deitutako Nazioko Defentsa Kontseiluak Justizia Auzitegi Gorenari epai horiek berrikusteko egindako eskariaren ostean iragarri dute erabakia. Madurok Kontseilua bildu du egoera konpontzeko asmoz, Fiskaltzak Auzitegi Gorenaren epaiaren aurrean erakutsitako jarreraren ondorioz.

Bestalde, Kontseiluaren erabakiz, "Auzitegi Gorenari dagokio botere publiko nazionaleko edozein erakunderen jarduerak konstituzionalak diren ala ez kontrolatzea, baita botereen artean gerta daitezkeen istiluak konpontzea ere".

Oposizioak manifestazioa egin du Caracasen, Auzitegi Gorenak erabakiak zuzendu dituen arren

Ehunka pertsona bildu dira gaur Caracasen, Auzitegi Gorenaren eta Gobernuaren aurka protesta egin eta Parlamentuaren alde egiteko, nahiz eta Botere Judizialak erabakiak zuzendu dituen.

Hortaz, oposizioko alderdiek ostiralean egindako deialdiarekin bat egin dute dozenaka venezuelarrek, Justizia Auzitegi Gorenaren azken erabakiak salatzeko. Izan ere, "Nicolas Maduroren Gobernuarekin koordinatuta" daudela uste dute, "demokraziaren kaltetan".