KRISIA EKIALDE HURBILEAN
Enfrentamentuak Beiruten, AEBetako enbaxada ondoan, manifestari eta poliziaren artean
AGENTZIAK | ERREDAKZIOA
Palestinako banderak eskutan, manifestazioa egin dute Israelen eta Donald Trumpen azken erabakien aurka. Poliziak gas negar eragilea eta ura bota die manifestariei.
Your browser doesn’t support HTML5 video
Libanoko Poliziak gas negar eragilea bota die Libanon, Beiruten AEBek duten Enbaxadatik gertu, protestan ari ziren manifestariei. Donald Trump AEBetako presidenteak Jerusalem Israelgo hiriburutzat aitortu izanak eragin ditu protestak.
Gas negar eragileaz gain, ur kanoiak erabili ditu Poliziak manifestarien aurka, eta hauek, botilak jaurti eta su eman diete gurpil eta zaborrontziei.
Bertako komunikabide lokalen arabera, hainbat manifestari zauritu dituzte istiluetan.
Ezkerreko alderdiek, alderdi islamista libaniarrek eta talde palestinoek deitu dute protesta. Palestinako banderak eskutan, Israelen eta Trumpen kontraoko oihuak bota dituzte eta bien irudiak erre dituzte.
Azken egunetan protesta gehiago izan dira hainbat herrialde arabiar eta musulmanetan, Trumpen erabakiaren ostean. Inguru hartako buruzagi politikoak eta nazioarteko komunitatea Trumpen erabakiaren kontra agertu dira.
Israelek 1967an okupatu zuen Jerusalem Ekialdea eta 1980ko anexioaren ostean, NBEak nazioarteko komunitateari bere legazioak handik erretiratzeko eskatu zion.