Venezuela
Guaidok kaleetan protestatzeko deitu du, 'Parlamentuaren hartzearen aurka'
Agentziak | Erredakzioa
Igandean, hainbat polizia-agentek eta militar batzuek osatutako lerro batek Ganberan sartzea eragotzi zion Guaidori, eta astearte honetan egoera hori errepikatzeko zorian izan da.
"Altxatzeko garaia da", esan du Guaido Venezuelako oposizioko lider Guaidok. Argazkia: EFE.
Venezuelako oposizioko lider Juan Guaidok manifestazioak deitu ditu hurrengo egunetarako, bere iritziz batzuek ahalegina egin baitute herrialdeko Parlamentua hartzeko, "indarkeria erabiliz"; izan ere, igandean, hainbat polizia-agentek eta militar batzuek osatutako lerro batek Ganberan sartzea eragotzi zion Guaidori, eta astearte honetan egoera hori errepikatzeko zorian izan da.
"Kaleari luzatzen diot deialdia, sektore guztiei; altxatzeko garaia da, indarrez altxatzeko garaia. Kaleko jarduerak egingo ditugu ostegunean eta ostiralean, larunbatean kalera joango gara, eta asteartean denok joango gara elkarrekin Asanblea Nazionalera", esan du Guaidok. Ia 60 herrialdek aintzatesten dute Guaido Venezuelako bitarteko presidente gisa.
Prentsaurrekoan, Guaidok esan du "altxatzeko garaia" dela, "galdegitekoa, eskatzekoa, Venezuela konkistatzekoa, diktadurari garaitzekoa".
Hala, hilaren 9an eta 10ean, ostegun eta ostiralarekin, biltzarrak eta kale-topaketak egingo dituzte; hilaren 11rako, hau da, larunbaterako, "baterako mobilizazioa" deitu dute; eta hilaren 14an, asteartearekin, Guaidok gonbit egin die Venezuelako herritarrei diputatuak Parlamentuko saiora laguntzeko.
Luis Para Ganberako presidente izendatu zuten saioa ez du onartzen
Halaber, Guaidok nabarmendu du bera dela Ganberako presidentea, bere izendapena dela balioa den bakarra, eta nabarmendu du ez duela onartzen Luis Parra presidente izendatu zuten saioa; erakunde ofizialen aldekoak diren hainbat diputatuk eta oposizioaren sektore txiki batek bultzatu zuten Luis Parraren izendapen hori.
"Parlamentu bakarra dago, instalazio-saio bakarra dago, botere legegile bakarra dago, presidente arduradun bakarra dago", esan du.
Gainera, Juan Guaidok eskatu dio Vladimir Padrino Defentsa ministroari bilera bat deitzeko, Parlamentuaren egoitza zergatik "militarizatuta" dagoen azaltzea helburu. Venezuelako Poliziak, igandean, ez zien utzi Guaidori eta oposizioko hainbat diputaturi sartzen Parlamentuaren saiora; egoera hori astearte honetan errepikatzeko zorian izan da, baina, azkenean, hori ez da gertatu.