Venezuela
Protesta egiteko "mobilizazio kanpaina" aurkeztuko du Guaidok "datozen egunetan"
Agentziak | Erredakzioa
Oposizioko kideak "batasuna" eskatu die herritarrei, eta Nicolas Maduro Venezuelako presidentea boterea uztera behartzen saiatzeko protestak deituko dituela iragarri du.
Juán Guaido, Venezuelako oposizioko kidea. Artxiboko argazkia: EFE
Nicolas Maduro Venezuelako presidentearen aurka protesta egiteko datozen egunetan "mobilizazio kanpaina" abian jarriko duela iragarri du Juan Guaido Venezuelako behin-behineko "presidente arduradun" eta oposizioko kideak.
"Protesta egiteko mobilizazioen agenda aurkeztuko dugu datozen egunetan", esan du Guaidok Twitter bidez zabaldutako mezu batean. Ildo horretatik, mobilizazio horien bitartez herritarrei euren "eskubidea gauzatzeko" deia egingo diela gaineratu du.
"Kalean aurkituko gaituzte, bidezkoa delako; herri baten aldarria delako, ez Juan Guaidorena bakarrik, eta etorkizuna gutako bakoitzaren esku dagoelako”, nabarmendu du oposizioko buruak. Halaber, "batasuna" eskatu die "talde guztiei, ez soilik politikoei". "Guztiei", azpimarratu du.
Ez da lehen aldia Guaidok Nicolas Maduro Venezuelako presidentea boterea uztera behartzen saiatzeko mobilizazioak deitu dituela. Asteazkenean iritsi zen Venezuelara, "nazioarteko bira arrakastatsua" amaitu ostean.