400 euroko isunak Lombardian, maskararik ez daramatenei

Lombardia Italiako eskualdean, herrialdean 15.000 pertsona baino gehiago hil dituen koronabirusak gogorren jo duen inguruan, 400 euroko isuna jarriko diete, atzoz geroztik, kaletik ahoa eta sudurra maskaraz edo, horrelakorik ezean, bufanda batez estalita eramaten ez dituztenei.   

Eskualde mailako ordenantza Attilio Fontana Lombardiako presidenteak onartu du, eskualde horretan 49.000 pertsona kutsatu eta 8.600 hil dituen birusa hedatzea ekiditeko helburuz.

“Maskarek % 100ean konpontzen dute arazoa, bufandek % 30-40an, baina ezer ez jartzea baino hobe dira”, azaldu du Fontanak Radio Padania irrati kateak egindako elkarrizketa batean.

Agindua apirilaren 13ra arte egongo da indarrean, Gobernuak onartutako konfinamendu nazionala bukatzen den egunera arte.

Nahasmendua

Ekimen honek eztabaida piztu du herrialdean, agintari politiko eta sanitarioak ez baitira bat etorri etxetik kanpo maskara eramatea komenigarria ote den.

Munduko Osasun Erakundeak martxoan esan zuenez, maskara eramateak segurtasun sentimendu faltsu bat eman diezaioke erabiltzen duenari eta, horrela, gerta liteke beste neurri batzuk ez hartzea.

Angelo Borrelli Italiako Babes Zibileko buruak maskara erabiltzea gomendatu zien larunbatean metro eta erdiko tartea errespetatu ezin dutenei, baina erantsi zuen berak ez duela erabiltzen, nahiago duelako gomendatutako tartea uztea beste pertsonekin.

Giuseppe Sala Milango, Lombardiako hiriburuko, alkateak adierazi du herrialdean maskarak falta direla, eta osasun agintariei eskatu die farmazien hornidura zaintzeko eta kontuz ibiltzeko ez ditzaten prezio neurrigabean saldu.