Gatazka
Ameriketako Estatu Batuek 5.000 militar zabalduko dituzte Afganistanen, talibanei aurre egiteko
Agentziak | EITB Media
Komunikatu batean, Bidenek talibanak mehatxatu ditu erantzun militar "azkar eta sendo" batekin, baldin eta AEBko langileei edo Afganistango enbaxadari erasotzen badiete.
Talibanak Kabulera hurbiltzen ari dira. Argazkia: Efe.
Joe Biden Ameriketako Estatu Batuetako (AEB) presidenteak larunbat honetan esan duenez, Afganistanen "5.000 bat" militar zabaltzea baimendu du, ostegunean iragarritako 3.000 soldaduak baino gehiago, talibanei aurre egiteko.
Komunikatu batean, Bidenek talibanak mehatxatu ditu erantzun militar "azkar eta sendo" batekin, baldin eta AEBko langileei edo Afganistango enbaxadari erasotzen badiete, talde horrek Kabulen aurrera egingo duen beldur.
"5.000 militarren zabalpena baimendu dut, AEBko langileen eta beste aliatu batzuen erretiratze ordenatua eta segurua ziurtatzeko", adierazi du agintariak.
Soldaduek milaka afganiar ebakuatzen ere lagunduko dute, gerran zehar tropa estatubatuarrei lagundu zietenak eta AEBetara joateko bisatuak eskatu dituztenak, "talibanen aurrerapenagatik arrisku berezian dauden herrialdeko hiritarrez gain", gaineratu du.