UKRAINAKO GERRA
Googleren Errusiako filiala porrotetik gertu dago
AGENTZIAK | EITB MEDIA
Filialak adierazi du Googleren doako zerbitzuek herrialdean funtzionatzen jarraituko dutela, hango bulegoa itxi arren.
2021ean Google Errusiako galerak 26.000 milioi errublo izan ziren. Argazkia: EFE.
Googleren Errusiako filialak porrot egingo du, Fedresurs errusiar erregistro ofizialak argitaratutako dokumentuak adierazi duenez.
Aipatutako dokumentuaren arabera, enpresak "2022ko martxoaren 22tik, bere porrota eta diru-betebeharrak betetzeko ezintasuna aurreikusten du", eta "kaudimengabe" deklaratzeko asmoa du.
Momentuz, ez dago argi zein den porrotaren arrazoia. Errusiako agintariek Googleri isun milioidunak ezarri zizkioten, herrialdean legez kanpokotzat jotzen den edukia kentzeari uko egin ondoren. Gainera, errusiar hedabideak enpresa teknologikoaren filialaren aurka aurkeztu ziren.
Antza, konpainiak Ukrainako kanpaina militarrari buruzko zortzi milioi iragarki blokeatu zituen, eta Errusiako enpresen publizitatea atzerrian ikustea eragotzi zuen. Enpresak Errusiako 60 komunikabide ofizial baino gehiagoren publizitatea ezabatu zuela kalkulatu dute. Gainera, Googlek Errusiako Estatuak finantzatutako hedabideek beren plataformen bidez dirua jasotzea debekatu zuen.
Interfax agentziaren arabera, 2021ean Googleren Errusiako filialak 26.000 milioi errubloko (409 milioi dolar inguru) galerak izan zituen.
Hala ere, filialak adierazi du Googleren doako zerbitzuek (Gmail eta YouTube, besteak beste) herrialdean funtzionatzen jarraituko dutela, hango bulegoa itxi arren.