Kolonbia
Petrok su etena iragarri du ELN, beste talde paramilitar eta gerrilla batzuekin
Agentziak | EITB Media
Askapen Nazionalerako Armadarekin (ELN) ez ezik, FARCeko disidentziekin, Autodefentsa Gaitandarrekin eta Sierra Nevadako taldeekin ere itxi du akordioa Kolonbiako presidenteak.
Gustavo Petro, artxiboko argazki batean. EFE
Gustavo Petro Kolonbiako presidenteak iragarri duenez, alde biko su etena erdietsi du Askapen Nazionalerako Armadarekin (ELN), FARCeko disidentziekin eta zenbait talde paramilitarrarekin. Menia urtarrilaren 1etik ekainaren 30era arte egongo da indarrean.
Su etena "luzatzeko aukera" egongo da "negoziazioetan aurrera egiten den heinean", zehaztu du presidenteak sare sozialetan kaleratutako mezu batean.
Guztira, bost izan dira akordioa itxi duten taldeak: Kolonbiako Askapen Nazionalerako Armada (ELN), FARC Kolonbiako Indar Armatu Iraultzaileen disidentzien Estatu Nagusi Zentrala eta Segunda Marquetalia, Autodefentsa Gaitandarrak eta Sierra Nevadako paramilitarrak.
Petrok 2022a amaitzeko ordu batzuk falta zirenean egin du iragarpena. "Su etena adostu dugu ELNrekin, Segunda Marquetaliarekin, Estatu Nagusi Zentralarekin, AGC Autodefentsa Gaitandarrekin eta Sierra Nevadako Autodefentsekin urtarrilaren 1etik ekainaren 30era, negoziazioek aurrera egin ahala luzatzeko aukera izango bada ere. Erabateko bakea errealitate izango da", idatzi du Petrok Twitterren duen profilean.
Hemos acordado un cese bilateral con el ELN, la Segunda Marquetalia, el Estado Mayor Central, las AGC y las Autodefensas de la Sierra Nevada desde el 1 de enero hasta el 30 de junio de 2023, prorrogable según los avances en las negociaciones.
— Gustavo Petro (@petrogustavo) January 1, 2023
La paz total será una realidad.
Presidente denetik, joan den abuztuaren 7tik, Petroren gobernuak "erabateko bakearen" politikaren alde egin eta ELNrekin bake elkarrizketak abiatzea lortu du.
Iragarpenaren ondotik, Antonio Guterres Nazio Batuen idazkari nagusiak "pozez" hartu du albistea. Guterresen hitzetan, neurriak "Urte Berrian Kolonbiako herriaren bake iraunkorra lortzeko itxaropenak berritu ditu".