Latinoamerika
Beste buruzagi politiko bat hil dute Ekuadorren
Agentziak | EITB Media
Pedro Briones Revolucion Ciudadana alderdiko buruzagia tiroz hil dute, Fernando Villavicencio presidentegaia erail eta egun batzuetara.
Pedro Briones, bi alderdikiderekin. Argazkia: @PaolaCabezasC
Pedro Briones Ekuadorreko Esmeraldas eskualdeko Revolucion Ciudadana alderdiko buruzagia (Rafael Correa presidente ohiaren alderdia) hil zen astelehen honetan, bere etxebizitzaren ondoan tirokatuta. Hilketa Fernando Villavicencio presidentegaia hil eta egun batzuetara gertatu zen.
Ekuadorko 'El Universo' egunkariak aipatutako polizia iturrien arabera, motorrean zihoazen bi pertsona parke batera hurbildu ziren, eta hainbat aldiz tiro egin zioten bertan.
Senideek eta bizilagunek ospitalera eramateko ahaleginak egin arren, hildakotzat jo zuten iritsi zenean, lepoaren ezkerraldean jasotako bi bala talken ondorioz.
"Ekuadorrek bere garairik odoltsuena bizi du. Gobernu ezgai baten eta mafiek hartutako estatu baten erabateko utzikeriari zor diogu hori. Nire besarkada solidarioa Pedro Briones lankidearen familiari, indarkeriaren eskuetan erori baitzen. Aldaketa premiazkoa da!", argitaratu du Luisa Gonzalez Revolucion Ciudadadana taldeko presidentegaiak Twitterren.
Ecuador vive su época más sangrienta. Esto se lo debemos al abandono total de un gobierno inepto y a un Estado tomado por las mafias.
— Luisa González (@LuisaGonzalezEc) August 14, 2023
Mi abrazo solidario a la familia del compañero Pedro Briones, caído en manos de la violencia.
¡El cambio es urgente!
Hilketa hori Fernando Villavicencio Movimiento Construye alderdiko presidentegaiaren aurkako atentatutik egun batzuetara gertatu da. Gertakariak Ekuadorko eta nazioarteko herritarrak astindu zituen.
Herrialdeak bizi duen indarkeria espiral horrek hainbat politikari hil ditu, hala nola Rider Sanchez Valencia, Actuemos alderdiko Esmeraldasen Batzar Nazionalerako hautagaia, edo Agustin Intriago, Mantako alkatea, uztailaren 23an tiroketa batean hildakoa.