Gerra Gazan
Derrigorrezko desplazamenduek milioi bat palestinar baino gehiago urrundu dituzte Rafahtik, UNRWAren arabera
Agentziak | EITB MEDIA
Israelen azken bonbardaketek 20 pertsona baino gehiago hil dituzte Gazako hegoaldean eta erdialdean. Bestalde, urriaren 7an hildako israeldar baten gorpuzkiak aurkitu dituztela iragarri du Israelgo Armadak.
Errefuxiatu palestinarrak Gazako kanpaleku batean. Argazkia: EFE.
Derrigorrezko desplazamenduak milioi bat palestinar baino gehiago urrundu ditu Gazako Rafah hiritik, UNRWA Palestinar Iheslarientzako Nazio Batuen Agentziak astelehen honetan iragarri duenez.
Gazako Zerrendaren hegoaldeko muturrean dagoen hiri txikian milioi bat palestinar inguru zeuden, baina Israelen erasoak direla eta, beste alde batzuetara ihes egin behar izan dute, laguntza taldearen arabera.
Maiatzaren hasieratik, Israelgo armada "operazio mugatua" egiten ari da Rafahn, Hamaseko borrokalariak desagerrarazteko eta Gaza gobernatzen duen talde islamista palestinarrak erabilitako azpiegitura desegiteko.
Israelgo armadak "handitutako eremu humanitario" batera joateko esan die zibilei, 20 kilometrora. Horren ondorioz, palestinar asko kexatu dira Israelen erasoen aurrean kalteberak direla eta azken hilabeteetan Gazako Zerrendan gora eta behera ibili direla.
Urriaren 7an hildako israeldar baten gorpuzkiak aurkitu dituzte
Israelgo Armadak jakitera eman du urriaren 7an Hamasek Nir Oz kibutz inguruan, Gazako kokagune palestinarretik gertu, egindako erasoan hildako israeldar baten gorpuzkiak aurkitu dituela.
Identifikazio zientifikoko proba berriek, gorpuzkien kokapenari buruzko informazioarekin batera, 35 urteko israeldar horren gorpua zela baieztatu dute.
Bonbardaketek jarraitzen dute Gazan
Bien bitartean, 20 gazatar baino gehiago, horietatik hiru haur gutxienez, hil dira gaur goizaldean Jan Yunisen eta Palestinako enklabearen erdialdean, Israelen aire-erasoetan, su-eten negoziazioak gorabehera.