Hego Koreako presidenteak gerra-legea ezarri du, baina Parlamentuak salbuespen neurria baliogabetu egin du

Yoon Suk-yeol Hego Koreako presidenteak gerra-legea ezarri du gaur, eta oposizio politikoari "Estatuaren aurkako jardueratan" aritzea leporatu dio.

Yoonek telebistaz emandako hitzaldi batean iragarri duenez, ezohiko neurri hori martxan jarri du, eta oposizioari "matxinada planifikatzen" ibiltzea egotzi dio.

Hego Koreako presidenteak gerra-legea ezarri du "ordena konstituzionala babesteko", eta "Estatuaren aurkako" ekintzak egitea leporatu dio oposizioko alderdi nagusiari, Alderdi Demokratari (PD).

Lee Jae-myung oposizioaren buruak salatu duenez, aldiz, "Armada herrialdearen kontrola hartzen saiatzen ari da", eta "presidenteak traizioa egin dio Hego Koreako herriari". Azpimarratu duenez, "une honetatik aurrera Yoon Suk-yeol ez da jada herrialdeko presidentea".

Gainera, Hego Koreako Asanblada Nazionalak gerra-legea bertan behera uztearen alde bozkatu du, Yoon Suk-yeolek neurria iragarri eta gutxira deitutako ezohiko osoko bilkuran.

Osoko bilkuran, ganberan nagusi diren oposizioko indarrek aldeko 190 botorekin onartu dute gerra-legea baliogabetzea, eta horrek, Hego Koreako Konstituzioaren arabera, neurria atzera botatzera behartzen du presidentea.

Milaka pertsona bildu dira Asanblada Nazionalaren aurrean gerra-legearen aurka protesta egiteko.

Batzar Nazionalean (Parlamentua) gehiengoa duen PDk, Yoonen Herriaren Indarra Alderdiaren (PPP) babesik gabe, 2025erako aurrekontu orokorrak onartu ostean hartu du erabakia azken horrek. Dirudienez, aurrekontuek murrizketa ugari aurreikusten dituzte, baita fiskal nagusia eta erakunde publikoen kontuak monitorizatzeaz arduratzen den Auditoretza eta Ikuskaritza Batzordeko arduraduna kargutik kentzea ere.

Park An-su Estatu Nagusiko buruzagia gerra-legeko komandante izendatu dute, eta Asanblea Nazionalaren zein alderdi politikoen jarduera debekatu du, Yonhap albiste-agentziak jakitera eman duenez.

Telebista-kateek zabaldutako irudien arabera, Poliziak Batzar Nazionalerako sarrera blokeatu du. Hala eta guztiz ere, oposizioko parlamentariak, manifestariak eta kazetariak Seulgo Ganberan sartu dira, eta eraikinean dauden soldaduak bertatik ateratzen saiatzen ari dira.