Aranburu (Reala): "Aukerak sortzeko erraztasuna dugu"

Mikel&' || 'nbsp;Aranburu txuri-urdinen kapitainak hitz egin du gaur arratsaldean Anoetako prentsa aretoan. Azpeitiarrak nabarmendu duenez, joko ikusgarririk egin gabe ere "aukera asko" ari direla sortzen eta "golak erraztasunez" sartzen dituztela. Dizidarik gabe puntuak ateratzen jakitea talde handien ezaugarrietako bat da eta aurtengo sasoian horri buruz zer edo zer badakiela frogatu du Realak. "Jokoaz ez gara ahazten. Emaitzen babesean den-dena ongi egiten ari garela ez dut esango. Baloia hanketan dugunean pazientzia falta zaigu", erantsi du.

Horretaz gain, Claudio Bravok Radio Euskadin esandakoei buruz galdegin zaio. Txiletarrarentzat, jarraitzaileek etxekoekiko duten begirunea ez omen dute kanpotarrekiko. Aranburuk belarriak goxatu dizkio. "Talde bat garelako doaz gauzak ongi, nahiz eta batzuk besteek baino laudorio gehiago jaso. Gu oso gustora gaude berarekin eta gutaz aparte ikusleek ere baloratzen dute. Onenetarikoa da". Bravok ez du onik izan mingaina askatu duen arte, baina batzuetan hobe izaten da gordean uztea bere salaketak ez duelako ez hanka eta ez buru. Anoetako jarraitzaileak berebiziko estimutan izan ditu atzerritarrak, merezi baino gehiago asko eta askoren kasuan eta etxekoek adina txistu ez dute sekula entzun, Zubieta-kumeari gehiago exigitu ohi zaiolako. Gainera, jarraitzaileen gehiengoak ezin du sinetsi nola Bravo bezalako goi mailako atezain batek bigarren mailan tokia duen txapeldunen liga lehiatzen ari den beste edozein taldetan izan beharrean.

Entrenamenduari dagokionez, Xabi Prietok orkatila bihurritu du taldera bueltatu den egun berean. Froga gehiago egingo dizkiote diagnostiakoa eman baino lehen. Nsuek eta Labakak beren kasara dihardute.

Azkenik, hilaren 30ean jokatuko du Realak Las Palmasen kontra Anoetan arratsaldeko seiretatik aurrera.