Caja Laboral-Olympiakos,(85-89): Porrota, Top 16ari hasiera emateko

Caja Laboral Baskoniak ez zuen ondo hasi Euroligako Top 16ko ibilbidea. Buesa Arenan 85-89 galdu zuen Olympiakosen aurka.

Partida hasieran Olympiakos bikain kantxaratu zen eta azkar hasi zen abantailak lortzen (2-7). Baskoniak ezin izan zuen erreakzionatu eta bosgarren minutuan greziarrak ziren nagusi markagailuan (8-15). Caja Laboralek ez zuen bere jokoa aurkitu eta lehen hamar minutuak 18-25eko emaitzaz bukatu ziren.

Bigarren laurdenean, ordea, Baskonia izan zen hasiera ona egin zuena eta aldeak murrizten hasi zen 5-0eko partzialarekin eta bi puntura jarri ziren (23-25). Momentu txarra pasa zuen minutu horietan talde greziarrak, baina ondoren esnatu egin zen eta abantaila garrantzitsuak hartzen hasi zen berriro. Partida 39-45eko emaitzarekin iritsi zen atsedenaldira.

Atsedenalditik bueltan Caja Laboral indartsu kantxaratu zen eta partida berdintzea lortu zuen laurdenaren erdialdera (45-45). Ondoren aurrea ere hartu zuten markagailuan gasteiztarrek, baina azken minutuetan asko parekatu zen jokoa eta Olympiakos bi puntuko abantailarekin iritsi zen hirugarren laurdenaren bukaerara (63-65).

Azken laurdenaren hasieran neurketa parekatuta egon zen, baina minutuak pasa ahala greziarrak nagusituz joan ziren. Azkenean, Olympiakosek lortu zuen garaipena (85-89).

Fitxa teknikoa:

85.- Caja Laboral (18+21+24+22): Ribas, English (2), San Emeterio (20), Teletovic (18), Splitter (10)-hasierako bostekoa-, Huertas (23), Herrmann (2), Dean (2), Singletary, Eliyahu (8).

89.- Olympiacos (25+20+20+24): Teodosic (14), Halperin, Childress (21), Kleiza (18), Schortsanitis (4)-hasierako bostekoa-, Papaloukas (4), Bouroussis (18), Penn (3), Vujcic (4), Mavrokefalides (3).