Operazioa
Laugarren zulo bat aurkitu du Ertzaintzak Ondarroan
Erredakzioa
Urtarrilaren 26an hasi zuten operazioan lau zulo aurkitu dituzte dagoeneko. Gaurkoa hutsik dagoela azaldu dute ikerketarekin erlazionatutako iturriek.
Ertzaintzak beste zulo bat aurkitu du Ondarroatik gertu, laugarrena joan den 26an hasitako operazioan. Zulo berri hau hutsik dago, ikerketarekin erlazionatutako iturriek azaldu dutenez. Poliziak bederatzi pertsona atxilotu ditu operazio honetan.
Iturri berdinen arabera, atxilotutako bi ustezko ETAko kideek erabiltzen zuten laugarren zulo hau. Operazio honetan Ertzaintzak aurkitu duen zaharrena da. Igor Martín, Jacan atxilotu zuten gaztearekin erlazionatuta dago zuloa.
Ondarroatik gertu, mendi gune batean aurkitu dute gordetegia, aurreko hirurak zeuden tokitik oso hurbil.