Asel Luzarraga etxean giltzapetuta egon beharko da, Txilen

Asel Luzarraga idazle eta musikari bizkaitarra etxean giltzapetuta egongo da, gaur goizean Temucon (Txilen) egindako bista eta gero epaileak hartu duen erabakiaren arabera.

''Asel Askatu'' plataformak eitb-com-i azaldutakoaren arabera, epaiketa ospatzen den eguna heldu arte etxe barruko arrastatzean mantenduko du epaileak. Luzarraga abenduaren 31an atxilotu zuten, Txilen, Temucoko herriko Justizia idazkaritzaren aurka atentatua egiten saiatzea leporatuta.

Bere etxean lehergailuak egiteko materiala topatu zutela azaldu zuten orduan polizia iturriek. Epaileak adierazi zuzenez, idazle euskalduna "gizartearentzat arriskutsua" da, eta ihes egiteko arriskua ere bazegoen.

Txileko auzitegi batek behin-behineko espetxealdia ezarri zion Asel Luzarraga euskal idazleari (Bilbo, 1971), La Araucania eskualdeko Justizia Idazkaritzaren aurka izandako atentatu saiakera batekin zerikusia izatea egotzita.

Antza denez, atentatuaren egileek bonba bat eztandarazi nahi zuten aipatu eraikinaren aurka, baina lehergailuak huts egin zuen eta ez zen lehertu.

Bi aste lehenago, antzeko bonba bat lehertu zen Temucoko farmazia batean, eta iazko abenduan beste bat eskualde berbereko Zigor Defentsoria Publikoaren egoitzan.

Poliziaren arabera, idazlearen etxean hutsik zegoen su-itzalgailu bat eta lehergailuak egiteko materialak atzeman zituzten.

Idazlea ez ezik, Asel Luzarraga musika talde bateko abeslaria ere bada. Besteak beste, Hamaika ispilu ganbil (2003) eta Karonte (2005) liburuak idatzi ditu.