Poloniako hauteskundeak eta errefuxiatuen krisia

Europan errefuxiatuen arazoa oraindik gehiago korapilatzeko falta zena: Polonian eskuineko nazionalistek irabazi dituzte hauteskundeak! Jaroslaw Kaczynskiren Legea eta Justizia alderdiak aise irabazi ditu hauteskundeak, eta gehiengo osoarekin osatuko du Gobernua. Horrek esan nahi du Poloniak errefuxiatuen gaian bat eginen duela Hungaria buru duen etorkinen aurkako mugimenduarekin. Korronte horretan daude Eslovakia, Txekia eta Lituania ere. Bada, mugimendu horren buru den Viktor Orban Hungariako presidentea miresten duela aitortu du Kaczynskik, eta gisa honetako adierazpenak egin ditu: "Etorkinek gaixotasun berriak ekar diezazkigukete, eta gainera, musulmanak badira, mehatxu dira Poloniako nortasun katolikoarentzat".

Poloniako hauteskundeen ondoren, Europako Batasunak are zailago izango du errefuxiatuen auzian politika bateratua adostea. Eta ez hori bakarrik, zailago izanen da Errusiarekin harremana hobetzea ere. Errusiaren kontrako herrialdea da Polonia. Aurreko Gobernuak jada Errusiarekiko enfrentamendua babesten zuen, eta oraingoa are gogorragoa izango da Moskurekin.