Bilbao Basket-Brose Baskets, (76-66): Final-laurdenetara!

Bizkaia Bilbao Basketek beste garaipen bat lortu du Eurocupean. Oraingoan Brose Basketsi 76-66 irabazi dio BECen eta txapelketa honetan galdu gabe jarraitzen du talde bizkaitarrak.

Fotis Katsikarisek zuzentzen duen taldeak erritmo bizia ezarri zion partidari hasieratik eta abantaila handiak hartu zituzten. Bazirudien erraz nabarmenduko zela Bilbao Basket lehen laurdenean, baina Brosek erreakzionatu egin zuen eta lehen laurdena bukatzeko minutu bat falta zenean partida berdindu zuten (18-18). Lehen hamar minutuak etxeko taldearen aldeko 21-18ko emaitzarekin bukatu ziren.

Bigarren laurdena lehenaren antzera joan zen. Hasieran Bilbao Basket jaun eta jabe, baina azken minutuetan Brose Baskets hurbildu egin zen. Bizkaiak bost puntu inguruko aldea mantendu zuen laureen guztian zehar, baina atsedenaldira iristeko 45 segundo falta zirenean hiru puntura hurbildu zen talde alemaniarra (35-32). Norgehiagoka 38-35eko emaitzarekin iritsi zen atsedenaldira.

Hirugarren laurdena oso berdindua izan zen. Brosek stsedenalditik bueltan hobeto jokatu zuen eta hasi eta jarraian aurrea hartu zuten markagailuan. Momentu horretatik aurrera bi taldeetako batek ere ez zuen abantaila handirik lortu eta Bizkaiak lau puntuko aldeaz bukatu zuen hirugarren laurdena (52-48).

Azken laurdenean Bilbao Basketen joko onena ikusi ahal izan genuen. Pixkanaka abantila handiak hartzen hasi zen Bilbao Basket, 14 punturainokoak ere (63-49). Azkenean, garaipena etxean geratu zen 76-66ko emaitzarekin. Orain, Bizkaiaren helburua multzoko lehen postua ziurtatzea da.

Fitxa teknikoa:

76 - Bizkaia Bilbao Basket (21+17+14+24): Javi Rodriguez (4), Blums (3), Warren (7), Hervelle (6) y Moiso (14) -hasierako bostekoa-; Salgado (-), Mumbru (11), Banic (9), Markota (9), Seibutis (10), Vazquez (3) eta Hampl (-).

Entrenatzailea: Fotis Katsikaris (GRE).

66 - Brose Baskets (18+17+13+18): Goldsberry (5), Gavel (-), Jacobsen (12), Suput (5) eta Pleiss (4) -hasierako bostekoa-; Brian Roberts (18), Elton Brown (13), Tadda (-), Garret (5) eta Worthington (4).

Entrenatzailea: Chris Fleming (AEB).