Ministroak matxinatu zaizkio Cameroni

Erresuma Batuak Europako Batasunean jarrai dezan baiezko jarrerak irabaztea nahi badu, David Cameronek bere etsaien babesa beharko du, bere ustezko lagunak traizioa egiten hasi direlako. Bere gobernuko sei ministroek eta eragin handia duen Londreseko alkateak, Boris Johnsonek, iragarri dute ezezkoaren aldeko kanpaina egingo dutela. Johnsonek iragarpenak kalte handia egingo dio Cameroni, kontserbadoreen artean itzal handia duen politikoa delako. Litekeena da Johnsonek hartu duen erabakiak helburu argi bat izatea: Cameronen ordezko izatea, alegia, kontserbadoreen lider berria izateko bidea prestatzea, eta jarrera horrekin, nekezagoa izango da Erresuma Batua Europako Batasunean jarraitzea.

Cameronek egoera zailean ikusiko du bere burua, Jeremy Corbyn lider laboristak eta Nicola Sturgeon Eskoziako lehen ministroak defendatzen duten jarrera bera defendatu beharko duela. Bide batez, eskoziarrek jada bota dute mezua: Europako Batasunean jarraitu nahi dutela. Gainerako britaniarrek Batasuna uztea erabakitzen badute, Eskoziarrek independentziarako bigarren erreferenduma egiteko une aproposa izan liteke.