Joko arriskutsua Sirian

Siriako gerra zibila Ekialde Hurbileko gatazka bihurtzeko arriskua gero eta nabarmenagoa da. Batez ere, Turkiak eta Iranek esku hartzea da kezka gehien sortzen duena.

Turkiak dagoeneko indartu du Siriarekiko mugan duen posizioa. Iranen kasuan, Siriako errebeldeek ia berrogeita hamar iraniar bahitu izanak Teheran egoera zailean jarri du.

Bashar Al Assad Siriako presidentea da Iranek inguruan duen aliatu nagusia, eta horregatik babesten dute. Aliantza horri esker, Iranek Hizbola talde xiita libanoarrari armak eta dirua ematen dizkio Siriako lurren bitartez.

Irango ayatolentzat, ezinbestekoa da Hizbola indartsu bat egotea, Ekialde Hurbileko kontuetan eragin handia izateko bidea ematen dielako. Assad erortzen bada, zubi hori erori egingo da, eta ondorioz, Iranek influentzia hori galdu egingo luke.

Horregatik, errebelde siriarren laguntza handiena Iranen etsai diren gobernu arabiarrak dira, Saudi Arabia eta Qatar, guztien buru.

Han, duela urte batzuetatik hona, xake-politiko partida konplikatua jokatzen ari dira. Alde batetik, Pertsiar Golkoko monarkiak, Islameko adar sunikoak direnak. Bestetik, Irango errepublika islamiarra, hau xii adarrekoa.

Iraniarrek monarkia horiek bota nahi dituzte, eta monarkia horiek ayatolak kendu nahi dituzte.

Momentuz, guztien onerako, aurrez-aurreko zuzena ez izatea erabaki dute, baina beraien arteko liskarra Siriara eraman dute, oso arriskutsua den jokoan.