Hauteskundeak Euskadin: 'Alea jacta est'!

Zegokiona baino lau hilabete lehenago iritsiko da bozkatzeko eguna. Egoera zailean zegoen historiako lehen Jaurlaritza sozialista, Alderdi Popularrarekin legegintzaldi hasieratik zuen ituna amaitu ondoren. Legebiltzarrean gehiengorik izan gabe, bere ahultasuna agerian uzteko arriskua zuen, astea joan astea etorri. Oposizioko alderdiek ere presio handia egin diote Lopezi hauteskundeen eguna aurrera zezan. Irtenbide gutxi zuen, beraz, lehendakariak. Espekulazioak alboratu eta alderdien lehiarako bi hilabeteko bidea zabalik uztea erabaki du lehendakariak.

Gaur entzundakoaren arabera, Rajoyren murrizketen aurrean, euskal autogobernuaren defentsan oinarrituko du diskurtsoa Lopezek. Baina aukeratutako egunak bete-betean bat egingo du ETAren indarkeriaren amaieraren urteurrenarekin. Jakina izanagatik, ETAren indarkeriarik gabe egingo diren lehen bozketak izateak garrantzi historikoa du, zalantzarik gabe. Data horren inguruan, bakegintza prozesuaren balantzeak egingo dira, ezinbestean, eta horrek kanpainako hitzaldietara eramango du gaia. Bakea, beraz, kanpainan izango dugu, eta ez da baztertu behar egun horien inguruan ETAren adierazpenen bat heltzea.

Baina egoera ekonomikoa da, datu guztien araberan, herritarren kezka nagusia. Hurrengo aste edo hilabeteotan Espainiaren erreskatea helduz gero, kezka eta beldurra areagotu egingo dira. Alderdiak horren jakitun dira, eta indarrak gai horretan jartzeko estrategiak diseinatu dituzte. Herritar izutuari bermea eta konfiantza helaraztea izango da hautagai eta alderdien ahalegin nagusietako bat. Diru kontuak kudeatzeko fidagarriena nor den, horixe izango da hurrengo bi hilabeteotako kinka nagusia. Hori ondoen islatzen duenak asko izango du irabazita hurrengo hauteskundeei begira.

Urriaren 21eko gauean gertatzen dena gertatzen dela, ezinbestekoa dirudi, halere, itun politikoen beharrak. Inkestei erreparatuz, edonor gailenduta ere, beste alderdiren batekin elkar ulertu beharko du irabazleak, agindu ahal izateko. Legebiltzarraren hurrengo osaera horrek aukera eta bide berriak irekiko ditu euskal politikagintzan.