Epaileak Lapuerta auzipetu du, Barcenasi dirua ezkutatzen uzteagatik

Pablo Ruz Auzitegi Nazionaleko epaileak bidegabeko jabetzea leporatuta inpuntatu du Alvaro Lapuerta PPko diruzain ohia. Ruzen arabera, enpresariek emandako dirua Barcenasek Suitzan ezkutatzea onartu zuen Lapuertak.

Epailearen autoan agertzen denez, Barcenasek dirua "Lapuertaren oniritziarekin eraman zuen Suitzara, alderdian zuen karguaz eta kontabilitate paraleloaren iluntasunaz baliatuta".

Bestalde, Luis Barcenas PPko diruzain ohiak Valentziako PPko zuzendaritzari egotzi dio Gürtel sareko enpresen kontratazioa. Barcenasek auzipetu gisa deklaratu du PPren finantziazio irregularrak ikertzen dituen auzian.

Barcenasek bideokonferentzia bidez deklaratu du Soto del Realeko kartzelatik, fiskalak eskatuta. Deklarazioak ordu erdi iraun du. Barcenasek 2012an Valentziako Auzitegi Gorenean egindako deklarazioaren zenbait puntu gehiago azaltzea nahi zuen fiskalak.

2007ko hauteskunde kanpaina

Deklarazioa Gürtel auziko adar valentziarraren lehen piezaren inguruan izan da. Barcenas adar horretan auzipetuta dago. Bertan 2007ko udal eta autonomi hauteskundeetan ustez izandako delitua ikertzen ari dira.

PPko diruzain ohiak fiskalak, epaileak eta Javier Gomez de Liaño bere abokatuak egindako galderei erantzun die.

Ustezko delitua gertatu zen garaian PPko diruzaina zen Luis Barcenas, eta hauteskunde kanpainan egindako kontratazioekin zerikusia izatea ukatu du. Ardura hori, Barcenasen arabera, Valentziako PPko zuzendaritzarena zen.

Barcenasek gehiegizko gastua egon zen ala ez jakitea edo Valentziako PPren 'B' kutxa baten berri edukitzea ukatu du.