CAN
Barcinak errua onartuta dimititu egin behar duela uste du oposizioak
Erredakzioa
PSNren hitzetan, Barcinak “egin behar duen lehenengo gauza Nafarroako Gobernuko Presidentetzatik berehala dimititzea da”, “erkidegoa guztiz geldiarazita eta eskandalu batean sartuta duelako”.
Yolanda Barcina Nafarroako presidentea. EITB
Oposizioko alderdien ustez, Yolanda Barcina Nafarroako presidenteak bere errua onartu du Nafarroako Kutxatik jaso zituen dietak itzultzean, eta dimititu egin behar duela nabarmendu dute.
Santos Cerdan PSNko Antolakuntza idazkarik azaldu duenez, Yolanda Barcina Nafarroako presidenteak, Miguel Sanz presidente ohiak eta UPNko beste kide batzuk dietak itzultzea erabaki baldin badute diru hori "ezer ez egiteagatik kobratu" dutela onartzen dutelako da.
Horregatik, Barcinak "egin behar duen lehenengo gauza Nafarroako Gobernuko Presidentetzatik berehala dimititzea da", "erkidegoa guztiz geldiarazita eta eskandalu batean sartuta duelako", adierazi du.
Cerdanek esan du ez duela alderdian hitz egin dieten itzulpenari buruz, baina gauza bat CANeko Batzorde Iraunkor "opakua" dela (Yolanda Barcina, Miguel Sanz, Alvaro Miranda Ekonomia kontseilari ohia eta Enrique Maya Iruñeko alkatea horren parte ziren), eta bestea Erakunde Sortzaileen Junta dela zehaztu du (Roberto Jimenez eta Samuel Caro ziren partaide).
Jimenez PSNko idazkari nagusiak eta Caro Parlamentuko bozeramaileak 2011n CANen haien ordainsariak (34.000 euro bakoitzak) publiko egin zituztela azaldu du, eta erabaki horregatik "asko kritikatu" zituztela gaineratu du.
Esan duenez, Barcina "urrunago joan da" eta Erakunde Sortzaileen Juntakoak ere itzuliko ditu, ez du gauza bera egingo Miguel Sanzek, Iraunkorrekoak bakarrik itzuliko baititu.