Elkarrizketa Radio Euskadin
Ondarroako alkatea: 'Segurtasun sailburua hemen egon behar litzateke'
G. Palacios
Ondorroako alkateak nabarmendu duenez, "herrian denok ezagutzen dugu Urtza Alkortak egindako lan politikoa, eta bere aurkako froga bakarra torturatua izan ostean lortutako autoinkulpazioa da".
Argi Ituarte Ondarroako alkateak azaldu duenez, Ertzaintza "banaka banaka" ari da Urtza Alkorta babesten ari diren pertsonak zubitik eramaten.
"Protesta baketsua da, desobedientzia zibilaren aldeko jarrera injustizia baten aurrean", esan du Radio Euskadin egindako elkarrizketa batean.
Ituartek begi onez hartu du Laura Mintegi edo Maribi Ugarteburu bezalako legebiltzarkideak Ondarrura bertaratu izana. Alabaina, Estefania Beltran de Heredia bertan egon beharko litzatekeela ere erantsi du. "Publikoki luzatu genion hemen egoteko gonbidapena eta hemen egon beharko litzateke".
Bestalde, Ituartek azpimarratu du "Ondarroan guztiek" ezagutzen dutela Urtza Alkortak egindako "lan politiko eta publikoa". "Militante politikoa delako atxilotuko dute Urtza; baina gogora ekarri behar da bere aurkako froga bakarra torturatua izan ostean lortutako autoinkulpazio bat besterik ez dela", salatu du.