Nafarroako hauteskundeak aurreratzea eskatu du PSNk

Nafarroako hauteskundeak aurreratzea eskatu du Roberto Jimenez PSNko idazkari nagusiak, eta "alternatiba" badagoela gaineratu du. UPNren Gobernuak hori baino "arazo larriagoak" daudela uste du, eta Bilduk "sirena hotsa" baino ez dela iritzi dio.

Ostegun honetan PSNko idazkari nagusiak idatzitako testuan irakur daitekeenez, "nafarrok ez gaude betiko UPNren Gobernuak sufritzera kondenatuta".

Horren ustez, "UPNren garaia amaitu da, aro berri bat hasiko da Nafarroan, eta ez da UPN izango Gobernuko burua". Sozialistek aro politiko berria positiboan hasi nahi dutela gaineratu du.

"Nafarrei hitza eman behar bazaie, ezinbestekoa da hauteskundeak aurreratzea", Roberto Jimenezen arabera.

UPN: "Badaude arazo larriagoak"

Juan Luis Sanchez de Muniain Nafarroako Gobernuko bozeramaileak hauteskundeak aurreratzea baino "arazo larriagoak" badaudela erantzun dio Roberto Jimenezi. "Gobernuaren lehentasuna herritarren arazoei irtenbidea ematea da", gaineratu du.

PSNren idatziaren gaineko balorazio ofizialik ez dutela egin adierazi du, baina lehentasuna herritarrei arreta jartzea dela azpimarratu du.

PSNrekin lanean jarraitzeko asmoa agertu du UPNk, eta Gobernuak mahai gainean dituen proiektuak eta neurriak onartzeko beste alderdi politikoen babesa behar duela nabarmendu du.

Bilduk "sirena hotsa" baino ez dela uste du

PSNren eskaria "sirena hotsa" baino ez dela adierazi du Bakartxo Ruiz Bilduk Nafarroako Parlamentuan duen bozeramaileak, eta herritarrei ziria sartzea larria dela gaineratu du.

Bilduk hauteskundeak aurreratzea eskatu aurren, eskari hori gauzatzeko ezer ez egitea egotzi dio PSNri. Horren adibide gisa, apirileko zentsura mozioa jarri du Bilduk.