Itun fiskala
PPk EAJ-PSE itunarekin bat egitea baztertu du Javier De Andresek
Erredakzioa
"Ez dugu erreforma honetan sinesten, EH Bilduk eta PSEk Gipuzkoan ezarritako proposamenetan oinarrituta dagoelako" kritikatu du Arabako ahaldunak.
Your browser doesn’t support HTML5 video
Javier de Andrés (PP) Arabako ahaldun nagusiak PPk jeltzaleek eta sozialistek adostutako erreforma fiskalarekin bat egitea baztertu du, "EH Bilduk eta PSEk Gipuzkoarako adostutako plan bera delako".
De Andres Arabako Batzar Nagusien Batzorde Ekonomikoan izan da krisiari aurre egiteko plana aurkezten. Bertan egindako hitzaldian, PPk ez duela erreforma fiskalarekin bat egingo iragarri du.
"Ez dugu erreforma honetan sinesten. Bestelako planteamendua daukagu eta ez dugu akordio horrekin bat egingo", esan du ahaldun nagusiak- De Andresen ustez, EAJ-PSE ituna "herriaren interesen eta enplegua sortzeko beharraren kontra doa" enpresa sareari kalte egingo diolako eta "opor fiskalak" auziarengatik eta "antzeko beste gaiengatik".
Batzordearen amaieran, De Andresek azalpen gehiago eman ditu hedabideen aurrean: "EAJk arazo handiak izango ditu Jaurlaritza kudeatzeko eta PSEren babesa beharko du, baina hori ez da aitzakia PSEk eta EH Bilduk Gipuzkoa ezarritako proposamen fiskalekin bat egiteko".
EAJ, PSE, PP bilera
Adierazpenok bihar Gasteizen EAJk, PSEk eta PPk itun fiskalaz hitz egiteko egingo duten bileraren bezperan egin ditu ahaldun arabarrak. Bilera horretan Arantza Quiroga Euskadiko PPko presidentea, Andoni Ortúzar (EAJ) eta Patxi López (PSE) izango dira.