Elkarrizketa, Radio Euskadin
PSNk eta Geroa Baik Gobernu aldaketa eskatu dute
Erredakzioa
Sozialistek hauteskundeak aurreratzea nahi dute, baina abertzaleek ez dute zentsura mozioa aurkeztea baztertu.
Roberto Jimenez PSNko idazkari nagusia. EFE
Roberto Jimenez PSNko idazkari nagusiak eta Manu Ayerdi Geroa Baiko parlamentariak Nafarroan Gobernu aldaketa eman behar dela adierazi dute.
Nolanahi ere, Jimenezen ustez, Yolanda Barcina Foru Gobernuko presidenteak hauteskundeak aurreratu egin beharko lituzke, eta Ayerdik ez du baztertu zentsura mozioa aurkeztea.
"Boulevard" Radio Euskadiko saioan egindako elkarrizketa batean, Nafarroan Gobernuz aldatzeko unea heldu dela esan du Jimenezek: "Gizartea UPNren Gobernuaren jokaerarekin nazkatuta dago".
Horren hitzetan, Barcinaren Exekutiboa "ahula" da, eta halabeharrezkoa da egoera hori "aldatzea". Hala eta guztiz ere, zentsura mozioa ez dela bide egokiena esan du, bide hori hautatuta ere, Gobernu berriak "egonkortasunik" izango ez lukeelako.
Bestalde, Ayerdik "gizartea nazkatuta" dagoela nabarmendu du, eta "etikarik eta baliorik" ez izatea egotzi dio UPNri.
"Gobernuaren eta Parlamentuaren arteko borroka hau ez da ona herritarrentzat, eta UPN tematu delako gertatzen ari da hori, erabaki mingarriak hartzen ari baita", gaineratu du.