Estrasburgoko epaiaren ostean
Biktimen zenbait elkarte kalera aterako dira epaiaren kontra egiteko
Erredakzioa
Terrorismoaren Biktimen Elkarteak (AVT) eta Terrorismoaren aurkako Ahotsa plataformak jakinarazi dutenez, manifestazioak egingo dituzte Estrasburgoko epaiaren kontra daudela adierazteko.
Mari Mar Blanco eta Angeles Pedraza Barne ministroarekin bildu eta gero, epaiaren egunean. EFE
Angeles Pedraza Terrorismoaren Biktimen Elkartearen (AVT) presidenteak eta Francisco Jose Alcaraz eta Terrorismoaren aurkako Ahotsa plataformako presidenteak iragarri dutenez, biktimak kalera aterako dira Estrasburgoko Giza Eskubideen Auzitegiak Parot doktrina bertan behera uzteko erabakiaren kontrako aldarria egiteko.
"Pazientzia agortu zaigu dagoeneko", ohartarazi du Pedrazak Auzitegi Nazionalak aho batez Ines del Rio kaleratzea onartu eta gero. ANren erabakia Europak ebazpena hartu eta hurrengo egunera heldu da. AVTk igandean, urriak 27, egingo du manifestazioa Madrilen, Kolon plazan.
Pedrazaren iritzian, "ezmorala" da Auzitegi Nazionalaren erabakia, eta uste du Auzitegi horrek justiziaren moteltasuna pairatzen duten herritarrei azalpenak eman behar dizkiela, askok lapurretak, besteak beste, egiteagatik hilabeteak daramatzatenean erabaki baten zain.
Francisco Jose Alcaraz Terrorismoaren aurkako Ahotsa plataformako presidenteak, halaber, epaiaren kontrako manifestazioaren data iragarri du, uste baitu Gobernua "zurigarri" gisa erabiltzen ari dela, ETAko presoen kaleratzeak onartzeko.
Terrorismoaren aurkako Ahotsak 'herritarren matxinadari' ekiteko aurrerapausoa ematea erabaki du, hiritarrek Estrasburgoren erabakiaren kontra daudela adierazi dezaten, eta bide batez Gobernuari irmotasuna eskatzeko. Manifestazioa azaroaren 9an deitu dute.
"Gobernuaren jarreragatik da, epaiagatik baino, neurri batean espero genuela. Gobernua zurigarri gisa erabiltzen ari da epaia, ETAko presoak askatzeko eta hurbiltzeko prozesua mantendu ahal izateko", salatu du.