Adierazpenak
Calparsoro: 'Ez du ematen ETA aurten desegingo denik'
Erredakzioa
EAEko fiskal nagusiak esan du, elkarrizketa batean, bandak ezin duela iraun, "aktore politiko bezala ere ez, bere ibilbide kriminalarengatik".
Juan Calparsoro. Argazkia: EiTB.
Juan Calparsoro EAEko fiskal nagusiak esan du uste duela "ez duela ematen" ETA "aurten desegingo denik". Igande honetan El Diario Vascok argitaratutako elkarrizketa batean, Calparsorok adierazi du bandak ezin duela iraun, "aktore politiko bezala ere ez, bere ibilbide kriminalarengatik": "Bere izena bera aipatzeak -nabarmendu du- antidemokrazia, mina eta izua dakartza, demokrazia eta gizartearen kontra koatea izango litzateke".
Ildo horretan, Calparsorok azpimarratu du bere ustez Sortuk gogorrago eskatu beharko lituzkeela, jendearen aurrean, ETAren desarmea eta desegitea. Izan ere, alderdi horren estatutuak "oso argiak dira, jarduera armatuari uko egitean".
Zigor-politikari dagokionez, Calparsorok esan du ETAren balizko desegitearekin batera, "Gobernuak berak iragarri duenez" "malgutasuna erabat erraztuko litzateke, presoen gerturatze batekin eta graduen progresioekin"; hala ere, ez du uste hori 2014an jazoko denik, ez duelako ematen bandak erabaki hori aurten hartuko duenik.
Gainera, nabarmendu du ezinezkoa dela graduen progresioa kolektiboa izatea, eta ez dela posible, halaber, amnistia bat; izan ere, presoek banaka hartu beharreko erabakiak dira.