'PPri bere estrategia gainera datorkio', Permachen arabera

Joseba Permach ezker abertzaleko buruzagiak (Sortu) esan duenez, une honetan, PP "bere lan ildoek eragindakoa pairatzen ari da", eta arerioak politikoki "gainbeheratzeko" erabili duen "estrategia gainera datorkio".

Donostian eskaini duen prentsaurreko batean, Permachek esan du "eskuin espainiarrak jarrera frankistak historikoki babestu dituen curriculum luzea" duela, eta "azken urteetan, gainera, ez ditu ekintza horiek kondenatu eta errefusatu".

"PPn gertatzen ari denak ekar ditzakeen ondorioak jakiteko gaitasunik ez dugu", esan du Espainiako Gobernuak bake prozesuan eman ditzakeen hurrengo pausoei buruz.

Ezker abertzaleko agintariak azaldu duenez, "PP herri honetako gizartearen gehiengoak eskatzen dionarengandik eta Herrian ireki den egoera berriak eskatzen dion erantzukizun politikoarengandik oso urrun dago".