ETAren armagabetzea
Barne Ministerioa:'Nazioarteko egiaztatzaileak ETAren konpartsak dira'
Erredakzioa
Estatuko Segurtasun idazkariak adierazi duenez, Polizia eta Guardia Zibila dira "benetako egiaztatzaileak".
Francisco Martinez Estatuko Segurtasun idazkaria (ezkerretik hasita lehenengoa). Argazkia: EFE
Francisco Martinez Estatuko Segurtasun idazkariak asteazken honetan adierazi duenez, nazioarteko egiaztatzaileak ETAren "konpartsak" dira, eta barregarri geratzen aditu bihurtzen ari dira.
"Espainiako gizarteak asko sufritu du, eta gai serioa da barregarri gelditzeko eta antzerkiko keinuak egiteko", adierazi du Martinezek Cope irrati kateari eskainitako elkarrizketan. ETAk egin behar duen gauza bakarra inolako baldintzarik gabe eta ordainik gabe betiko desagertzea dela gaineratu du.
Ostiralean Euskal Herrian agerraldia egingo dute nazioarteko egiaztatzaileek, eta ETAren armagabetzearen inguruan pausoren bat iragartzea espero da. Martinezen esanetan, ETAk benetan armak entregatu nahi dituenean esan dezala non dauden, "benetako egiaztatzaileek", Poliziak eta Guardia Zibilak, egiazta dezaten.
Bestalde, ETAk egin behar duen gauza bakarra desagertzea dela nabarmendu du. Halaber, "alor guztietan porrot egin duela modu esplizituan azaldu beharko luke, beste iragarpenek ez dute inolako arretarik merezi".