Azkunak 'larri baina egonkor' jarraitzen du, EAJk baieztatu duenez

Itxaso Atutxa Bizkaiko Buru Batzarreko (BBB) presidenteak esan duenez, Iñaki Azkuna Bilboko alkateak "larritasunean egonkor" jarraitzen du, eta etxean dago, "bere kordean, lasai eta senideek inguratuta".

Gainera, Iñaki Azkunak "indarrak batzea" espero duela esan du Atutxak, "Bilboko herria eta EAJ berearekin" daudelako.

Atutxak eta Andoni Ortuzar EAJren presididenteak bisita egin diote alderdiko afiliaturik nagusienari (105 urte). Bertan, BBBko buruak adierazi duenez, Bilboko alkatea "egoera berezi batean" dago, eta medikuak "haren eboluzioaren zain" daude. "Alkateak egonkor jarraitzen du, larritasunean", laburbildu du.

Udaleko kargura bueltatuko ote den galdetuta, Atutxak ez dakiela esan du, "medikuak ere eboluzioaren zain daudelako".

Gainera, azaldu duenaren arabera, atzo, ostiralean BBBren ezoihiko bilera Bilboko alkatearen osasun-egorak okerrera egin zuela jakinarazteko egin zuten, "zabaldutako zurrumurren osteko espekulazioak saihesteko" eta BBBren kideek Azkunaren "egoeraren berri izan zezaten".

Osasun arazoak

2003. urtean minbizia atzeman zioten, eta oraindik ere tratatzen ari da. Horri, baina, gaixotasun gehiago gehitu zaizkio azkenaldian.

2012ko apirilean ospitaleratu egin zuten, eta hiru hilabetez egon zen bertan. Alta jaso ondoren, jendaurreko agerraldia egin zuen ekainaren 14an, Alkateen Nazioarteko Foroan. Hala ere, berriz ere erietxera jo behar izan zuen uztailean, giltzurrunean ebakuntza egiteko. Abuztuan eman zioten alta.

Irailean, ordea, infekzioak jota, erietxera eraman zuen. Zertxobait hobera egin eta jarduera publikoari neurri txikian ekin zion, mugikortasun arazoak tarteko.

Joan den hilean berriz ere itzuli zen Basurtuko Ospitalera, erorialdia izan eta hematoma baten ondorioz. Otsailaren 23an alta eman zioten eta ordutik etxean da Bilboko alkatea.