Europako Batzordea
Brusela: 'Independentziak Katalunia EBtik kanpo utziko luke'
Erredakzioa
Egungo legearen arabera, Kataluniak independentzia eskuratuko balu, "automatikoki Europar Batasunetik kanpo" geratuko litzatekeela azpimarratu du Europako Batzordeak.
Durao Barroso
Europako Batzordeak Kataluniako Trantsizio Nazionalerako Kontseilu Aholkulariei erantzun die gaur, eta, egungo legearen arabera, Kataluniak bere independentzia aldarrikatuko balu "automatikoki Europar Batasunetik kanpo" geratuko litzatekeela azpimarratu du.
Trantsizio Nazionalerako Kontseilu Aholkulariak, autodeterminaziorako bidean aholkuak emateko Generalitateak sortutako organoak, atzo ukatu egin zuen Katalunia independentea izanez gero automatikoki Europar Batasunetik kanpo geratuko litzatekeela. Gaur, berriz, Europako Batzordetik kontrakoa nabarmendu dute.
"Europar Batasuneko Estatu bateko zati batek independentzia aldarrikatzen badu, Europako itunak ez lirateke herrialde horretan indarrean egongo", adierazi du gaur Alejandro Ullurzun EBko bozeramaileak.
"Beste modu batera esanda, Estatu independente berria beste herrialde bat izango litzateke Europar Batasunari eta bertako itunei dagokienez, eta, horrenbestez, independentzia ezartzen den lehenengo egunetik, itunak ez lirateke bertan indarrean egongo", gaineratu du.