Kongresua
Rajoyk iragarri dituen ustelkeriaren kontrako neurriak
Espainiako Gobernuko presidenteak ustelkeria politikoari aurre egiteko iragarri dituen neurrien laburpena.
Mariano Rajoy Espainiako Gobernuko presidentea. Argazkia: Efe
Mariano Rajoy Espainiako Gobernuko presidenteak ustelkeriari aurre egiteko proposamenak aurkeztu ditu gaur, lau ataletan banatuta: alderdi politikoen finantzen kontrola, goi-kargudunen jarduera, neurri judizialak, eta Kongresua eta Senatua.
ALDERDI POLITIKOEN FINANTZEN KONTROLA
- Pertsona juridikoen diru-ekarpenak debekatuko dira.
- Bankuek ezingo dituzte alderdien zorrak barkatu, ezta zorraren zatiak ere. Gainera, ezingo dituzte zorrak ordaintzeko baldintzak merkatuak ezartzen dituen baldintzen azpitik jarri.
- Alderdi politiko guztien kontuak publiko egin beharko dira.
- Kontuen Auzitegiak indartu egingo du diru-laguntzen eta ekarpenen kontrola.
- Norbanakoek ezingo dute 50.000 eurotik gorako ekarpenik egin.
- 25.000 eurotik gorako ekarpenak Kontuen Auzitegiari jakinarazi beharko zaizkio, eta alderdiaren webgunean argitaratuko da ekarpena egin duenaren izena.
ALDERDIEN BARNE DEMOKRAZIARAKO NEURRIAK
- Alderdietako zuzendaritzak lau urtean behin berritu beharko dira, hauteskunde zikloarekin batera, eta estatutuetan agertu beharko da neurria.
- Alderdi bakoitzak militanteen parte-hartze demokratikoa bermatu behar du, aukeratzen duen moduan: kongresua, batzarrak…
- Estatutuetan agertuko dira afiliatu guztien bermeak, haien eskubideak babestu eta erreklamazioak jartzeko prozedura zehazteko.
- Militantzia bertan behera geratuko da automatikoki ustelkeriarekin lotutako delituengatik ahozko epaiketa baldin badute.
- Betebehar horiek betetzen ez dituzten alderdiak desegin egingo dituzte.
GOI-KARGUDUNEN KONTROLERAKO NEURRIAK
- Goi-kargudunei arduren gaineko adierazpen bat sinaraziko diete, eta ezingo dute zigor-aurrekaririk izan delitu jakin batzuetan.
- Kargua hartzen duen unean eta uzten duenean, jarduera, ondasun eta eskubide guztien berri eman beharko du.
- Soldatak erabat publikoak izango dira Gardentasun Legea indarrean sartzen denean.
- Ordezkaritza gastuak hobeto arautuko dituzte, eta debekatu egingo dute kreditu-txartelik erabiltzea.
- Bateraezintasunen kontrola ere indartu egingo da interes-gatazken bulegoaren bitartez.
- Administrazio publikoen eta kontratuen legedia erreformatuko da, ustelkeria gehiago kontrolatzeko. Administrazioarekin kontratuak egiteko debekuak zabalduko dira eta prozedura negoziatuen erabilera mugatuko da.
ZIGOR KODEAREN ETA PROZEDURA KRIMINALEKO LEGEAREN ERREFORMA
- Alderdi politikoen legez kanpoko finantziazioa delitu gisa agertuko da lehenengo aldiz.
- Kargugabetzeak gogortu egingo dituzte.
- Ustelkeriarekin lotutako delituak preskribatzeko epeak luzatuko dituzte.
- Makroprozesuak azkartuko dituzte.
- Epemuga jarriko zaio instrukzioari.
- Gaizkileek itzuli behar dituzten ondasun guztiak azkar berreskuratzeko neurriak hartuko dituzte.
- 100 plaza berri jarriko dituzte epaile eta fiskalentzat, eta teknologia berrien erabilera indartzeko dirua jarriko dute.
KONGRESUA ETA SENATUA
- Diputatuen eta senatarien eskubideak eta betebeharrak bertan behera uzteko erregimena zabalduko da, alderdien artean adostasuna egonez gero.
- Indultuen kontrola. Sei hilabetean behin, emandako eta ukatutako indultuen inguruko txostena helaraziko diote Diputatuen Kongresuari.
- Justizia Ministerioak agerraldia egingo du indultuen inguruko azalpenak emateko.
- Herri ekimen legegileak eta herritarren parte-hartze politikoa bultzatzeko bideak indartuko dira.
indartuko dira.