Bake eta Bizikidetza lantaldea
"Beste zoru etiko bat" adosteko lanean ari dela esan du EH Bilduk
Erredakzioa
Dani Maeztu legebiltzarkideak baieztatu duenez, Sortuk eta EAJk "harremanak" izan dituzte Bake eta Bizikidetzarako Lantaldea berriz aktibatzeko.
Dani Maeztu, Radio Euskadin egindako elkarrizketa batean. EiTB
Dani Maeztu EH Bilduko legebiltzarkidearen esanetan, koalizio abertzalea "sukalde lanak" egiten ari da Eusko Legebiltzarreko Bake eta Bizikidetzarako Lantaldea abian berriz jartzea ekarriko lukeen "beste zoru etiko bat" adosteko.
Onda Vascan egindako elkarrizketa batean, zeregin horretarako Sortuk eta EAJk "harremanak" izan dituztela aitortu du Maeztuk.
"EH Bildu sukalde lanak egiten ari da beste zoru etiko bat adosteko, beste alderdiek mahaiaren inguruan ez esertzeko aitzakiarik izan ez dezaten", azaldu du.
Legebiltzarkide abertzaleak adierazi duenez, hainbat alderdik "ez mugitzeko eta aurrera ez egiteko aitzakiatzat erabili dute iraganaren irakurketa kritikoaren afera". "Eurek ez dute euren iraganaren irakurketa kritikoa egin, baina besteei egin dezatela eskatzen diete", deitoratu du.
Maeztuk jarrera aldatzea eskatu die gainerako alderdiei, egungo blokeoa gainditzea "oso zaila" baita.
'Euskal Bidea' proposamena
Bestalde, EH Bilduko legebiltzarkideak EAJren aurka egin du. "Euskal Bidea" proposamen independentistari buruz ez hitz egiteko, ETA erabili izana egotzi dio.
Horren hitzetan, autogobernuari buruzko lantaldea euskal herritarren etorkizun politikoaz hitz egiteko "leku bat" da, baina "ez bakarra".
Horren haritik, "Euskal Bidea" Euskal Herri osorako proposamena dela gogorarazi du Maeztuk, eta "ez EAErako bakarrik". "Proposamen batzuk ezin dira Legebiltzarrean eztabaidatu", gaineratu du.