Legegintzako herri-ekimena
Diru-sarrerak bermatzeko errenta zorroztea baztertu du Legebiltzarrak
Agentziak | Erredakzioa
EAJk, EH Bilduk, PSEk eta UPyDk atzera bota dute Laguntza Justuagoak herritar plataformak bultzatu eta Marotok babestutako ekimena.
Your browser doesn’t support HTML5 video
Eusko Legebiltzarrak baztertu egin du Diru-sarrerak Bermatzeko Errenta (DBE) jasotzeko baldintzak zorroztea eskatzen zuen legegintzako herri-ekimena, EAJren, EH Bilduren, PSE-EEren eta UPyDren botoekin. Alderdi Popularra, beraz, bakarrik geratu da ekimena babesteko orduan.
Laguntza Justuagoak plataformak bultzatu eta PPk babestutako ekimena da Legebiltzarrak onartu ez duen hori. Errenta jasotzeko baldintzak zorroztearen aldeko 37.000 sinadura aurkeztu zituen elkarteak, eta gaur bukatu du ekimenak bere bidea.
Javier Maroto PPko Gasteizko alkate eta legebiltzarkide ohiak proposatu zuen aurrena, diru-laguntza hori jasotzeko baldintzak gogortzeko, eta plataformaren esku geratu zen gero legegintzako herri-ekimena bideratzea.
Hain justu, horixe gogorarazi dute ekimenaren alde bozkatu duten taldeek: Maroto eta PP izan zirela ekimen horren sustatzaile nagusiak. Botoak lortu nahian, "herritarrak manipulatu" nahi izatea leporatu diete biei.
Laura Garrido PPko legebiltzarkideak, berriz, 37.000 herritarren ahotsa "isilaraztea" egotzi diete horren aurka bozkatu dutenei, eta ziniko eta hipokritatzat jo ditu.