Hauteskunde osteko itunak
Rajoyk akordioa eskatu die PSOEri eta C's-i, marra gorririk gabe
agentziak | erredakzioa
Azpimarratu duenez, Kongresuko 200 diputatu baino gehiagoren babesa izango luke, eta horrek “babes zabaleko” erreformak egitea ahalbidetuko luke, “urte askorako”.
Your browser doesn’t support HTML5 video
Mariano Rajoy Espainiako Gobernuko presidenteak berretsi du akordio handia lortu nahi duela PSOErekin eta Ciudadanosekin gobernua osatzeko, susperraldia egonkortzeko eta Espainian eta Espainiatik kanpo egonkortasun mezua zabaltzeko; eta azpimarratu du ez duela marra gorririk negoziatzeko.
COPEn egindako elkarrizketa batean azaldu duenez, inbestidura eztabaidan zehaztuko lukeen gobernu programa baten negoziazioan akordiora iristea da onena.
Rajoyk gogorarazi du adostutako Gobernu horrek Kongresuko 200 diputatu baino gehiagoren babesa izango lukeela, eta horrek "babes zabaleko" erreformak egitea ahalbidetuko lukeela, "urte askorako".
Rajoyk esan du ezeri ez dizkiola ateak ixten, baina esan du konstituzioaren erreformak geroz eta babes handiago izan, hobeto izango dela. "200 diputatu baino gehiagorekin erreforma konstituzionala egin daiteke", gaineratu du.
"Arazo asko konpon ditzakegu urte askorako. Aukera handia da", berretsi du.
Espainiako Gobernuko presidenteak uste du hauteskundeen emaitzak "errespetatu" behar direla; hala, aukera onena "funtsezko gaietan" ados dauden alderdi konstituzionalistek adostutako eta PPk zuzendutako Gobernua dela iritzi dio.
Aldiz, PSOEk "muturreko ezkertiarrekin" eta alderdi nazionalistekin egindako gobernua "Espainiaren interesentzat txarra" izango litzatekeela ohartarazi du, "ezegonkortasuna" eragingo lukeelako eta ez litzatekeelako ona izango "ez ekonomiarentzat ez politikarentzat".