Katalunia
Legea betetzeko eskura dituen tresnak erabiliko ditu Rajoyk
Agentziak / Erredakzioa
"Inoiz baino tresna gehiago ditugu gure batasuna defenditzeko, eta indar politiko gehienak ados gaude horretan", adierazi du.
Mariano Rajoy Espainiako Gobernuko jarduneko presidenteak adierazi duenez, "Kataluniak legea eta Konstituzioa betetzen dituen" begiratzen ariko da.
"Inoiz baino tresna gehiago ditugu gure batasuna defenditzeko, eta indar politiko gehienak ados gaude horretan", esan du. Hain zuzen ere, Kataluniako Parlamentuan Carles Puigdemonten inbestidura ekitaldia egiten ari direla eskaini du Rajoyk prentsaurrekoa.
Pedro Sanchezekin eta Alber Riverarekin harremanetan jarri dela adierazi du Rajoyk, eta legea betearazteko euren babesa duela gaineratu. Pablo Iglesias Podemoseko buruarekin bihar bilduko dela adierazi du Rajoyk. Horren ildoan, Kataluniako Gobernuak Konstituzioa edo arau juridikoak urratzen baditu zuzenbide Estatuaren erantzuna jasoko duela ohartarazi du.
"Estatuak eta demokraziak balio bera dute, Gobernua jardunean denean ere. Espainiarrak lasai egon daitezke", gehitu du.