Inbestidura negoziazioak
Iglesias: 'Lauko bilera Espainiako Gobernu berriaren argazkia da'
AGENTZIAK | ERREDAKZIOA
Pablo Iglesiasek esan du PSOE, Podemos, IU eta Compromis alderdiek koalizio-gobernua osatzeko baliatu behar dutela bilera, eta ohartarazi du Pedro Sanchezek gutxiengoan agintzea ez dutela babestuko.
Pablo Iglesias. Argazkia: EFE
Pablo Iglesiasek adierazi du PSOEk, Podemosek, IUk eta Compromisek egingo duten bilera "oso esanguratsua" dela eta "Espainiako Gobernu berriaren argazkia" izango dela.
Monica Oltra Valentziako presidenteordearekin bilera egin ostean, Iglesiasek agerraldia egin du Kongresuan. “Lau alderdiok elkarrekin gobernatzeko aukera irekita dago”, nabarmendu du.
Alberto Garzon IUko buruzagiak deitutako bilera horretan, baina, koalizio-gobernua osatzeari buruz hitz egin behar dela esan du, eta ez Pedro Sanchezek proposatzen duen inbestidurarako balizko itunari buruz.
Ildo horretan, Valentziako Gobernua jarri du adibidetzat; izan ere, erkidego horretan Alderdi Sozialista eta Compromis elkarrekin daude agintean.
Horrenbestez, Iglesiasek ohartarazi du Podemosek ez duela inolaz ere Sanchezek gutxiengoan gobernatzea babestuko, Gobernu ezegonkorra izango litzatekeela argudiatuta.
Beraz, PSOEren asmoa Ciudadanos, Podemos, IU eta Compromisen babesarekin gutxiengoan agintzea bada, aukera hori ahazteko esan dio Iglesiasek Sanchezi, “ezinezkoa delako”.
Azkenik, lau alderdien arteko negoziazio-bilerara helburuak ondo zehaztuta joateko galdegin dio Alderdi Sozialistari. “Herritarrei argi esan behar die zer egin nahi duen”, erantsi du.