Aske utzi dute Jon Enparantza abokatua, seme-alabak zain ditzan

Jon Enparantza ETAko presoen abokatua aske geratu da gaur arratsaldean, 25.000 euroko bermea ordaindu eta gero, seme-alabak zaintzeko.

Carmen Lamela Auzitegi Nazionaleko epaileak erreparatu egin dio Enparantzaren sendiaren egoerari. Izan ere, emaztea larri dago, ospitalean, eta ez dute nork zaindu bost seme-alabak (hiru 10 urtetik beherakoak dira).

Fiskaltza ere ados agertu da askatzearekin, "arrazoi humanitarioak tarteko".

Epaileak Estatutik ez ateratzea eta pasaportea entregatzea agindu dio. Gainera, astero epaitegira edo polizia-etxera bertaratzea ere ezarri dio.

Enparantza duela bi urte baino gehiago espetxeratu zuten, "Jake" operazioan.